Feeds:
Innlegg
Kommentarar

Archive for the ‘Tant og fjas’ Category

Nei, no er eg ikkje ung lenger, no kjenner eg jammen at eg er vaksen/gamal/passé/utsliten, stryk det som passar.. Om ryggen held, har eg altså om lag 33 år att som yrkesaktiv. Jippi.

Jubilanten er her avbilda i varmare strok, lett brisen og med bris i håret. Han ønskjer ikkje blomar på døra, men enorme pengegåver kan sendast inn på rette konto.

Read Full Post »

Året overgang: Flytta frå Voss til Førde. Slutta som vinkelner og byrja som bakar. Frå Grand Cru til grovbrød. Frå kveldsjobbing til tiiiidlig opp.

 

Ungane er søte, men sit sjeldan stille.. Her sat dei i allefall i ro i 1/60 sekund.

Lik ettersmaken av ein fløyelmjuk burgunder, kverv minnet om sjølv den beste vin med tida. Men nokre syrefriske set då spor i den mentale harddisken. Nokre gonger vert det skribla ned smaksnotat, andre gonger endåtil blogga om minnerike vinar. Svært mange av dei mest minnerike er så sjeldne og dyre at dei nok aldri vert smakt igjen, og det kjennest litt dumt å ikkje kunne formidle opplevinga i ord rike nok til å romme denne smakseksplosjonen. Men slik er det vel. Nokon har sagt at å skrive om vin, er som å danse om arkitektur. To som skriv bra om vin er Ole Martin og Rune.

Når ein skal til topps, er det som regel slik at fjellet kjem ikkje til deg, men du må gå til fjellet. I år var eg så heldig at fjellbygda Voss fekk besøk av eit par toppar. I januar kom Dirk Niepoort og Lois Seabra innom og mykje god vin vart servert. Eg fekk også invitasjon til Porto og Douro. I mars fekk vi besøk av Etienne Grivot med familie, frå Domaine Jean Grivot. Det vart ei flott smaking  av vinar frå Vosne-Romanée  og Nuits-Saint-Georges frå kommune- til Grand Cru-nivå. Mellom høgdepunkta var ein 1. cru Aux Reignots 99, rik, fruktig og litt utypisk Vosne. Laga i berre 300 flasker..

Lista:

Årets Champagne: Det vert nok Jacques Selosse VO, servert saman med mykje anna god vin og familie i Gøteborg. Runner ups er ein flott Roger Brun Cuvee des Sires la Pelle Extra Brut 2004 på Sandane og Selosse Vintage 99, servert til Niepoort og følgje i januar.

Årets beste gjensmak: Leroy Vosne-Romanée 04, då hyggjeleg Sunnmøring gjesta hotellet.

Årets vertikal: Ikkje noko vanskeleg val, dette. Servert på Quinta de Napoles i april. Niepoort Colheita 1937, 1934, 1912, 1900 og 1863. Sjeldan gamal vin vore så vital!

Årets eldste: Også frå Porto-turen. Servert utpå kvelden på avslutningsmiddag i lageret i Vila Nova de Gaia. Ein Niepoort Vintage frå 1840-åra, litt usikkert eksakt årgang. Bar preg av å vere på hell, men absolutt drikkbar. Det kan ein ikkje seie om alle 170-åringar!

Årets siste vin frå kjellaren på Park: Chateau de Fonsalette 2001. Også ein av årets beste raude. I selskap med gode kollegaer.

Årets mest oppløftande Loire chenin blanc-vin: Patrick Baudouin Anjou Les Saulaies 08.

Årets høgdepunkt frå eigen kjellar: Fourrier Gevrey-Chambertin VV 02. Løftar seg over vanlig kommunenivå. Elegant til Gevrey å vere. Forførande og smooth. Heldigvis har eg ei til.

Årets beste kvite: Mykje godt, men trur nok at Soalheiro Primeras Vinhas 2007 var den mest spanande.

Årets kvite søte: Fritz Haag Brauneberg Juffer-Sonnenuhr Riesling Auslese Goldkapsel 1992. Mogen, frisk, konsentrert og topp balanse mellom syre og sødme.

Read Full Post »

Fyrste fredag på lengje utan chips i heimen… korleis skal dette gå?

Read Full Post »

På måndag er det valdagen, men viktigare er det at no byrjar bokhausten! Og for dei som har kika innom ein bokhandel i fylket vårt, så veit de at jau, dei har dei siste bøkene til Jo Nesbø og Anne B. Ragde, men viktigast er nok bøkene om oss sjølve. Turbøker, lokalhistoriske vegvisarar, lokale skrøner, lokalhistorie og prydbøker frå fjell og fjordar. Her kjem eit lite glimt av floraen av bøker du snart vil finne på din lokale bokhandel.

Stig inn, for faen! Portrettbok frå Stig Roger Eide med interjvu av tjue kranglefantar frå fjordfylket. Oddleiv Apneset har teke bileta.

Dei sveisa Sunnfjord saman. Fyrste bok i eit fembandsverk om Ankerløkken og verftshistoria i Førde og Florø. Oddleiv Apneset har teke bileta. Denne vil nok liggje under mange juletre.

Dei brann for Halbrend. Kulturhistorisk vegvisar for Halbrend, Holten og Pernillevegen. Praktbok med mykje spanande frå eldre og nyare historie om Halbrendstraktene.

Stang ut. Hans Jakob Reite med skråblikk på Firda si dekning av lokalfotballen.

Mellom ørekyter og Ålhus. Johs B. Thue si bok om symjeopplæring på Jølster før og no.

Lakabodl! Finn Tokvam og Olav Stedje har reist rundt i Sogn på jakt etter dei største skrytepavane, nolevande og historiske. Oddleiv Apneset har teke bileta.

Sólo dame una señal. Ein spansk studie av signalbygg i norsk samtid frå 2009. Eit lite kapittel om dei planlagde signalbygga i Førde også. Kjem i norsk omsetjing ved Ragnar Hovland på Selja Forlag. Denne vil nok liggje under mange juletre.

Stig oppi gryta. Stig Roger Eide si kokebok for store og små på tur.

Mot toppen i lett fottøy. Arve Sandal si bok med gode tips og innsideinformasjon om dei 75 viktigaste motbakkeløpa i fylket. Uvurderleg for deg som siktar deg inn på topplassering i Gåsenipa Opp eller for å klare merkjet i Dragseide På Skrå.

Elles vil Operaen i Nordfjord setje opp Få meg på for faen, og Sogn og Fjordane teater set opp eit stykke basert på Olaug Nilssen si novelle «Glassnikkaren» frå sjuende klasse på Førde Ungdomskule.

Read Full Post »

Ferdig på jobb 1010 (1), slengje seg i bilen (2) og cruise bort på ølmonopolet for å handle inn Kinn og Ægir (3). Setet litt langt bak (4) og radioen på (5). Frese (6) opp på gode gamle Vie senter (7) og ser gamle kjende og handlar inn til helga. Dei har berre ein pakke wienerpølser og er utseld for dei andre sortane (8). Heim att og få tinga i kjøleskåpet, slengje seg på sofaen med twitter. Skulle ha sove litt (9), men er spent på kva som står i avisene. Men posten er ikkje komen til kl 1200 (10), så det vert blogging og nrk.no. Skulle teke oppvasken (11), men må opp att å sjekke postkassa snart.

Trur det kan bli greit i Førde. Berre eg får meg litt søvn..

 

1. Ja, ein byrjar tidleg på jobb i bakarbransjen.

2. Nei, ikkje sykkelen i dag. No går det unnabakke til gehenna med karen.. (og miljøet). Nei, no vert det FRP, som Kjetil Brottveit ville sagt.

3. Lokalt øl produsert i kommunane Flora og Aurland. Førde er einaste kommune utan ølsal i daglegvarebutikkane.

4. Har litt att til eg har inne alle rånarfaktene, men eg kjem meg.

5. Kor lengje går det før far i huset ofrar bagasjeplass for ein subkasse? Gå til din lokale bookmaker og sett peng på riktig tidspunkt.

6. «Frese» i den grad det er mogleg med ein sopass treig bil. Apropos bilbransjen, kor tid skal nokon kome på bana og ta dei? Håkon Haugsbø, make your move!

7. Nå ja, butikken er blitt Rema og eg finn ingenting lenger.. Og kvifor heiter det Vie senter? Det er då streng tatt berre ein butikk?

8. I følgje hyllene skulle det vere tre sortar wienerpølse.

9. Ja, ein byrjar tidleg i bakarbransjen..

10. Synes posten burde vore der til 12, men det kjem nok ikkje til å påverke kven eg skal røyste på på valdagen. No skal eg forresten førehandsrøyste, sidan vi flytta frå Voss og eg er pent nøydt til å røyste i den kommunen. Arg! Kanskje eg skal røyste blankt? Nei no, (sjå fotnote 2).

11. Brukte koppar, glas, besikk og gryter, som vert reingjort i kum med vatn og basisk (gjerne feittløysande) vaskemiddel, for så å bli skylt i reint vatn og turka.

Read Full Post »

Det knirkar! Tid for å fornye sykkelen, og for å spare nokre gram. Fjorårets store investering var nytt drivverk med den frekke KCNC-kranken som krona på verket. No skulle Sykkeldoktoren i Kvernberget ha noko frå salet til CRC, så då slo eg meg med og vi fekk det fraktfritt. Eg hadde eit sete liggjande frå ein tidlegare handel, men fekk ikkje bytta det ut, då festeskruene på setepinnen var rusta fast. Då vart det ny setepinne i denne omgang og nytt komfortabelt sete på plass. Komboen var (hald deg fast) 6 gram lettare enn det som stod på før.. Ja ja, alle monnar drar. Dei frekke Brooklyn Machine Works-pedalane med brusopnar var diverre slitne i akslingen, så dei har også hamna på sykkelkyrkjegarden.

No er det desse lette og fine NC-17, som skal vere plattform for turar og trakk. 386 gram/paret, og heile 458 gram lettare enn the Shinburgers frå New York!

Og for å hindre vatn og skit i augene; Evil Eyes! Mange tøffe namn på syklar og delar. Hmm.. bloggstoff? Skal sjekke det ut litt meir, og kome tilbake med meir.

Read Full Post »

f

Når la du sist ein ferietur til ein ny grusveg? Ikkje det? Vel, dette var fyrste gong for meg også. Men med mottoet «Sunnfjord, ditt næraste feirefogderi», la vi ut mot den forjetta grusvegen mellom Sygna i Gaular og Guddalen i Fjaler. Howie G stillte med Mondeo, GPS og musikk, medan Aili og eg tok med barnesete, godt humør og Nikon.

Både Naustedøler og NRF poserte i sola.

Meir kjeks?

Etter Nautsund, mellom Hovlandsdalsvatnet og Breivatnet, var det tid for å vasse og ete nista.

Vel framme i Dale, var det sjølvsagt klart for is og kaffi. Og gamle kjenningar dukka opp. DVD-spelarane kom ikkje til nytte, for ungane song med på soundtracket til Howie G.

 

 

 

 

 

 

 

 

 

 

 

 

 

 

 

 

 

 

 

 

 

 

Read Full Post »

Ved kjøkenbordet etter at middagen er fortært. Borna har som vanlig knapt ete noko, men brorparten av det som var på tallerkenen ligg no på golvet, og yngstemann (som enno ikkje har lært (sukk) å krabbe) smør det utover. Ute er det 18,4 grader og overskya. Dei er kledde i middelklasseklede kjøpt hovudsakleg på inspirasjonslause butikkar som H&M etc. Mor og far er (naturlig nok) trøytte, då mor har amma fleire gonger på natta, medan far har vore på druen og kome seint heim.

Mor (retta til far): Ungane må bade i dag, dei skulle ha bada for lengje sidan!

Far: Ja men dei har jo bada for lengje sida.

Mor og far: Hahahahahahhahahahahahahaha!

Mor og far ler ei god stund av dette, far lengst, då mor er trøytt fordi ho måtte amme fleire gonger om natta, medan far var på druen og kom seint heim.

(Familiesjølvironi er ikkje like morosamt som til dømes Are Kalvø, men det funkar som terapi. Kombinasjonen lite søvn, stort koffeininntak og rotet hus, kan også vere grobotn for enkelte morosame situasjonar, men som oftast ikkje..)

Read Full Post »

 

Ai ai! Vinterferieleir og fineveir på Voss. Andy, Hedda og S har installert seg, og sannelig kom ikkje Arildguten også på fredag. På laurdag var heile bunten på ski på Hanguren. Med småungar i beremeisar og pulk, blått under skia og blå himmel. Nypreparerte løyper og medium gli. Deilig å kome seg ut på ski. Ingvild vart lett solbrend på eine kinnet..

Sundag tok karane skia på skuldra og labba ned til Hangursbanen. Så var det klart for ein strålande dag i trekket. Skia mine var ikkje akkurat nypreparerte, men glien var det ingen ting å sei på. Mjølkesyra held seg også i bakgrunnen det meste av dagen. Offpisten var dog noko samanblåst, så noko pudder var det knapt. Men karane svinga seg elegant nedover, som ein Berlusconi mellom smårips og rettsaker. Arildguten knipsa både alper og alpinistar, så sjekk bloggen hans i næraste framtid for snøkledde toppar og posørar med raude kinn.

Eit par Samfunnsfiende med twintip og Bomber Bishop, kjøpt brukt frå min skipushar frå Gjøvikstraktene, for mange år sidan. Men framleis dei tøffaste skia i bakken. Og mannen oppå bolsar som aldri før.

Read Full Post »

32..

Då  var eg blitt eitt år eldre, igjen, du og du kor tida flyg. Det er som om det var i går eg kraup rundt på alle fire på jakt etter legoklossar. Hmm det var i går..

Vel, dagen går med til å trille til og frå Vangen for mating av Ingvild. Veldig dårlig brøyting på Voss. Så vert det confit til middag og crème brûlée til dessert. Og kanskje litt Clos de Vougeot..

Murakami, Mel C og Howard Stern kunne ikkje kome i år heller. Like greit, har ikkje nok confit.

Read Full Post »

Older Posts »